蔡卓妍有後遺症成日流口水
1月 28日 星期二 03:00 更新

向來咬字一口懶音的蔡卓妍（阿Sa）最近為了演出馬偉豪的新片《下一站，天后》，被導演下令秘密下苦功，由黃秋生路，以一招「咬樽蓋」唸詩改善發音。
阿Sa為了這招「咬樽蓋」改善法，在開工前練足一星期，絕不偷懶，聽晒秋生師傅話。當日秋生為糾正她的發音，在拍戲現場隨手拿起一支紅酒的酒塞，塞落阿Sa的小嘴，然後要她唸起古詩「床前明月光，疑是地上霜……」來，阿Sa即時發現自己的發音果然有所改善，原來咬樽蓋果真有效。

唔想講對白似靚妹

阿Sa不好意思的笑說：「雖然秋生師傅今次無份拍呢部戲，但係佢上次落我絕招真係有效，因為今次導演馬偉豪想一改我以前靚妹感覺，唔想我講對白上仍然好似以前講有種懶音，所以希望我咬字清晰，於是我咪用呢種練習法咯。其實戲中唔止我一個有懶音，陳小春同我都不相伯仲，我仲講笑話日後有機會作番隻《懶音王》唱。」

帶備樽蓋充當導師

阿Sa好學之餘，並在片場將這秘招發揚光大，隨身帶備酒塞、樽蓋等道具充當導師起余文樂、陳小春、周麗淇來，一於好大家學。不過學習這小秘招背後，卻為阿Sa帶來後遺症。

她蠻尷尬的說：「搞到我成日流口水呀！醜死怪，因為我唔記得吞口水，咪流晒出來咯，好肉酸。」為了片中所飾的歌星一角，阿Sa惟有頂硬上，這回倒真用心良苦了。