我今次遊行睇到好多,感覺到好多,原來不止是我,還有很多很多的年青人同市民,也很關心社會,也很擔心香港,有d人話係我地呢d傻佬,先會比人叫出黎遊行,話其實我地咩都唔知,仲有可能收左人錢先出黎,又有d人又話我地其實有好多都唔係對23條不滿,只係不滿政府處事不當,更加有人話我地係比美國佬,英國佬控制,我地傻既,我認我係傻,回想我以前1997前,一心一意支持香港政府,在那八個特首候選人中,我也是支持董建華,「當然佢最好啦!!」我不斷同人講,大家都認同,原來個時我先係最傻。
我地去遊行係傻,大家咁熱天時三十幾度,唔係屋企嘆冷氣,唔去睇戲,唔去游水,市政泳池免費喎!!沙灘都好丫!!之前一晚唔去唱k,唔去網吧。放假也大清早起身叫醒一早約好既朋友去飲茶,「唔好遲呀!!」買報紙去茶樓等位,一大班傻佬傻婆著晒最吸熱既黑衫,d人行過就諗,鬼唔知去遊行咩??傻佬!!
睇下報紙,打下牙交,等人齊,講下幾點出發,去邊落車,兩點出發,打算鑽石山去到天后,點知,落到地下鐵已經感覺個氣氛,好多好多黑衣人,係鯽魚涌等左四五班地鐵先上到車,銅鑼灣同天后都已經唔比落,迫住係炮台山落車,個車站由月台到出口都爆晒,好辛苦先出到地鐵站,一出車站就已經人山人海,我同d朋友跟住d人潮去左海旁,去到條天橋已經企左係度,好辛苦先行落天橋,維園已經入唔到,企左係天橋低,身邊好多傻人,但我地都好忍耐,等d警察比我地分批行,我地足足等左一個鐘先行左幾十步,眼望遠遠既維園門口,太陽就係頭上咁晒,,小小既一條街道,身邊既人群過以千計,d汗係咁流,但我地冇灰心,一定要入維園,因為知道之前收音機話過唔入維園唔計數,所以係咁等,知道得個一兩個入口先可以入到幾十萬人,點入去呢??開始見到d人爬欄杆入去維園,唔難入,咪跟住佢地羅,入到去,個邊幾個球場跟本冇人??都唔知點解工聯會話有五萬人??唔通佢計埋我地d遊行經過既人??咁應該唔止5萬丫??
兩個鐘,足足兩個鐘,先有得可以坐下,有人派水,可以去下洗手間,可以見到李卓人,佢就係我面前,我終於知道點解d人入唔到維園,出又係個條路,入又個條路,五十萬人,係晒一個地方,工聯會用晒其他個幾個出入口,所以d人入又入唔到,出又出唔到,其實唔止50萬,你想想警方話6:00就有35萬,但之前4:45點鍾左右已經有好多人遊行到左政府總部解散左,個成幾鍾起碼都10幾20萬啦,我係維園又等左成個鐘先可以出發,之後入黎左d人呢??一定唔止50萬。
我就係6:00最多人既時間出發,真係講都唔信,我地班傻佬行晒條路,一路叫口號,我一路留意下周圍d人,真係咩人都有,bb仔,小朋友,好多學生,更加多既係年青人,好多好多中年人,亦有好多上左年齡既老人,仲有傷殘人事,好多好多關心香港既人,去到灣仔,睇到一個有董建華個樣既廣告箱,心諗「唔係攞景呀??」點知後面就寫左一句「離香港有希望既日子。」之後係下面有個到數時鐘仲有成4年,即係仲有4年香港先有希望呀!!~~哈哈!!點算??
去到大公報門口,見到d人幫佢地再設計過門口,真係大快人心!!
去到金鐘,見到一對老公公老婆婆慢慢咁行,唔知點解我見到佢地我好感慨,老公公拖住老婆婆,一邊行一邊叫口號「唔要23條,還政於民」講出心中所想,睇到佢地一步一步慢慢行,雖然我身體好疲憊,但知道佢地仲辛苦,咁辛苦為咩丫,就係想政府既高官知道,我地唔要23條,我地唔要董建華,唔好比咁多野話我地比人誤導,我地係真心要上街遊行呀~~,迫我地上街既唔係任何人,就係唔清晰既23條,就係無能既董建華,你地清楚未??
雖然今次真係好辛苦好疲倦,但我都覺得值得,我都覺得自豪,因為我都為左我既不滿,我既憂慮,我既良心,走出黎同50萬同我一樣關心香港未來既傻佬行過歷史上既呢一段路。