我鍾意食白糖糕,但係我食唔落呀。步入熱鬧o既商場,人總係掛住歡笑o既面容,一群一群o既人潮之中,有o的係一家人,亦都有一雙一對,整個環境彌漫住節日o既氣氛,商場之內有好多臨時而設o既攤擋,正係為聖誕節而設,其中一個小食擋正係擺放o左一o的唔同o既肉乾同糕點,最吸引我o既,係一片片白色晶亮,入口軟綿綿,帶點甜味o既白糖糕。我雖然鍾意食白糖糕,但係我唔會買,望住佢...雙眼開始有o的踵痛o既感覺,慢慢...雙眼開始變得濛濃,本能話比我聽我唔應該逗留,所以我頭也不回離開o左,我...其實係好想再一次食一啖白糖糕o既味道。

自從去年春天佢病o左,我每星期總係有兩三日去探佢,間中都會順道去附近為佢買一o的白糖糕。記得細個o既時候同佢相處o左一段頗長o既時間,睇見佢經常都會買白糖糕返屋企食,久而久之,自己都開始鍾意食白糖糕。每次佢睇住我帶住白糖糕來探佢,佢都一定堅持分一半比我,根住又稻稻不絕咁「話當年」,一o的我已經聽過好多好多次o既塵年舊事。

炎熱o既夏天,o係烈日之下,我依然為佢買來白糖糕,佢仍然係一啖一啖咁食住,但係o個陣時佢總係分多一o的比我,慢慢...我分得o既愈來愈多,到最後佢終於問口講,佢o既食量已經大不如前,以後可以買少一o的。雖然佢食少o左白糖糕,但係佢仍然鍾意慢慢...慢慢咁講佢o既往事,而我...比以前更用心去聆聽。

夏季道別o既時候,往來醫院已經成為我生活o既一部分,我每次都會帶白糖糕,但每次都係佢...睇住我食全份,而我就睇住佢食流質o既食物,雖然佢無食過白糖糕,但佢用微弱o既聲線要我細心聽佢為我解釋日後種種要做o既事情,而我...只有傻傻咁望住佢,聽住佢講o既說話。

秋天俏俏來到,佢都俏俏話比我聽,佢就快要走喇,突然之間佢同我講,好想食少少白糖糕,我呆o左一陣,此時此刻望住佢,唔知點解,我感覺到人生當中第一次...咁緊貼o既絕望,o係眼前所發生o既一齊,係完全無能力、無辦法阻止,而我所能做到o既,只有將一片小小o既白糖糕...送入佢口中,呢一小片o既白糖糕,感覺...幾咁沉重,為o左使佢能夠安心進食,我自覺地將剩下來o既白糖糕一啖一啖咁放o係自己o既口入面,呢個時候白糖糕無半點甜味,只有濕而苦澀o既咸味。雖然佢食o左白糖糕,但係今次佢無講半句說話,o個次係我最後一次嘗到白糖糕o既味道。

過o左幾日o既深夜時分,我收到電話之後,趕快驅車去到醫院,我今次無帶白糖糕,以後都唔使再帶喇!我仍然鍾意食白糖糕,但係我真係食唔落。