登登登凳，新鮮出爐嘅「飛機阿姐」(唔係飛機場阿姐呀下)，堪稱最能表現「港女」一詞嘅意涵。我地而家先睇睇呢位飛機港女嘅遭遇先，去片：

7月7日早上9時10分，正要起飛的CX504客機(去東京)已滑行至跑道，卻突然停下，過了約15分鐘，有廣播要求乘客將行李放到座椅下，再過10多分鐘，機長透過廣播，解釋因經濟客艙有乘客拒絕放好行李，飛機將延遲起飛，乘客立即起哄，部份人更以粗話咒罵。

未機，多名機場保安及航空公司人員登機，走到接近機尾的窗口位置，要求該名年輕女乘客下機，雙方擾攘15分鐘，她仍拒絕就範。至10時許，三名軍裝警員登機交涉。

女乘客堅持：「搭開都唔使將個袋放落地下，點解今次又要？」

一名督察於是以強硬的語氣警告：「我家畀最後一次機會你，如果你唔合作，我哋會立即採取拘捕行動。」

該女乘客聞言即帶同其Gucci袋，與兩女伴步離機艙，此時差不多全機乘客響起熱烈掌聲，夾雜英文粗話，「歡送」她們離去。該女乘客離開前仍不甘地說：「唔關我事㗎！係佢哋（機組人員）太執着，我個袋大咗兩吋係都要我放落椅底咋喎。」

自稱是該女乘客的網友留言解釋：「雖然個Gucci係貴，但我唔係矜貴到連放個袋落地下都唔肯嗰隻女仔嚟，但係我啲嘢放晒喺個袋入面，成日要烏低身拎嘢，好唔方便㗎嘛，咁我之前都試過咁啦，又唔見人哋話我，我點知間間航空公司都唔同規矩啫。」她形容，自己初時「好聲好氣」跟對方理論，對方卻找機長作廣播，「咁大間公司蝦我哋幾個女仔，都唔知知唔知醜」，並說對香港男士失望，眼見「幾個女仔咁俾人蝦」卻袖手旁觀。 (以上報道錄自《蘋果日報》)

嘩哈哈，從這個報道，我地可以歸納「港女」一詞嘅意涵包括：

1. 盲追名牌(重點係盲)，唔理個袋係咪通街人人拎，唔理衣著襯唔襯(這裏不是指Gucci怪客，他可能周身名牌非常得體)，唔理咩場合(但咁得體的話，佢出席嘅場合應該唔係經濟艙囉)，總之死都要攬實一個名牌。

2. 蠻不講理——「搭開都唔使將個袋放落地下，點解今次又要？」——你紅公仔過馬路俾差人抄牌，你同人講「咁我過開都唔抄架嘛，點解今次又抄」囉。

3. 極度自以為視，以為自己啱晒，全世界都要就佢，仲死要面到底——「唔關我事㗎！係佢哋（機組人員）太執着，我個袋大咗兩吋係都要我放落椅底咋喎。」——如果你個臀部大咗兩吋要你坐落椅底就話無理啫，人人個袋大兩吋，加埋加埋咪大成千吋？成機睇唔過眼，都仲要「拿」番"炸"沙。

4. 極愛炫耀(重點在個「極」字)——雖然個Gucci係貴，但我唔係矜貴到連放個袋落地下都唔肯嗰隻女仔嚟——唔講個Gucci貴，對以上呢句野嘅意思冇乜影響，硬要強調，大把人知Gucci貴啦。

5. 方便自己，漠視他人——但係我啲嘢放晒喺個袋入面，成日要烏低身拎嘢，好唔方便㗎嘛——人人都要烏低身咁唔方便，獨佢最要方便，或者佢有過人之處，受不起地心吸力而容易下垂。

6. 邏輯力弱，唔緊要，但硬要無理取鬧——「咁我之前都試過咁啦，又唔見人哋話我，我點知間間航空公司都唔同規矩啫。」明知間間航空公司唔同規矩，都唔遵守，仲要攞第二間公司嘅嚟challenge你坐緊果間。就等於去美國住你可以擁有槍械，你帶枝槍番嚟香港，然後話「我之前都試過有槍啦，又唔見人哋話我，我點知個個國家都唔同規矩啫」。

7. 自己大晒，人地錯晒——「自己初時『好聲好氣』跟對方理論，對方卻找機長作廣播，『咁大間公司蝦我哋幾個女仔，都唔知知唔知醜』——我很相信國泰嘅服務，當初一定仲好聲氣過你咁勸你收埋個袋。另外，你幾個女仔蝦晒全機人，包括日本人(架機番東京)，又知唔知醜呢。

8. 盲批港男——並說對香港男士失望，眼見「幾個女仔咁俾人蝦」卻袖手旁觀——香港男士都係好多唔爭氣，不過如果當時有男士幫佢，我覺得佢唔係男人囉。

(為公道起見，第4至8唔入Gucci怪客數，因為網絡留言可以係冒名的，所以果幾點只針對留言果個女仔。)

好啦，我知道，一講親香港女仔，就會好惹火，會有女仔來罵戰，無論我點講我只係描述現象，冇貶斥之意，冇一竹篙打一船人，總有人對號入座，狂批我呢種港男(呢個係第9點)。跟住又有港男陪佢地玩，互相指罵，沒完沒了。

咁我都要報定案：香港都唔係咁易搵到有齊呢9點嘅女仔，每人都有缺點，但多到咁都可能得Gucci怪客(假設留言者真係佢)一個，所以各位港女，唔好嚟同我講「我冇咁冇咁，你以偏蓋全」、「你地啲男人好好咩…….」。

即係咁，我指出弱點，係希望大家會改善，把自己變得更可愛動人。正如啲乜叉護膚同減肥廣告不斷轟炸你話你外表點差，你會俾成皮嘢去幫襯，咁我只係講下啲普遍現象，等大家知道左可能存在嘅缺點，你係唔使俾錢都可以去改善，何樂而不為呢？

我知，我知道港男都好唔好架啦，但係你睇完呢篇文只係用批評港男唔得來反駁，你嘅缺點都唔會消失架。放過我，唔好留言轟我……嗚…….我最多送番幅港男照你啦。