男方日記：
不經不覺已經二月，不到兩個月就高考了。唯有過著自修室加快餐店的日子。
今日自修室一開門我就入去鋤書，跟住LUNCH去裕民坊整個快餐再砌過喇。
五點關門得閒無野做諗住去觀廣睇下有咩新GAME。
點知比我發現A.P.M間星巴克開左，理得佢，上左去睇下先算。
嘩……有條女斯斯文文好似幾靚女既FORM五度一個人係度飲咖啡。
我當然唔會錯過呢個機會，去買杯最貴既唔知乜野咖啡坐佢對面張再拎出一本諗住係自修室睇既書，米蘭昆德拉作既《生命中不能承受之輕》簡體中譯本。
諗住係佢面前顯示我既修養，我多次向佢打眼色，佢一D反應都無。
頂~~比佢晒左我二十幾蚊。
拿拿臨飲完杯咖啡去裕民坊整本便利加份蘋果叫埋阿恆去觀塘廣場間大家樂吹水好過。
咦，D咸片廣告又換左新野喎，不過呢排慣左BT。
阿恆係度食TEA，我就睇波經，諗住信青蛙仔買番場波，落去馬會買左條三串一。
上番黎點知比我見到之前星巴克條女同個FD係度睇姊妹，講野又鬼咁大聲。
原來之前係度扮上菜，而家D港女真係不知所謂。

女方日記：
今日訓到成十二點幾先起身，扮完靚靚之後兩點去左瑞和街間自修室度，點知無位喎~~
唉~~唯有去A.P.M間starbucks溫書同埋食野啦~
呢度真係好好哇，又無乜人，既可以專心溫書，最緊要係可以睇下有冇靚仔丫嘛~~
等到五點幾，突然有個好arm我feel既男仔入左黎，仲坐我對面tim~~
我仲見佢拎左本書出黎，我都唔知乜黎，但係好似係d好出名好叻叻ge書，大概係梁望峰D書掛，我真係好想好想去識佢呀，佢好似幾有性格，但係我又要保持矜持，我女仔黎架嘛。
佢仲係咁電我tim~~
唉…我已經比晒signal叫佢過黎架啦，但係佢又唔知點解走左去，嗚嗚，算啦，係佢自己唔識貨之嘛。
之後同埋TRACY去左業發八樓睇下有咩化妝品特價，買左二百幾蚊野，嘻嘻。
見仲有d時間，TRACY就話想去大家樂食少少野，我未買本雜誌陪佢囉。點知上到去見隔離有條友係度睇便利，仲講電話三句唔埋兩句粗口，憎死佢，佢應該仲有個FD架，但係原來佢個FD就係頭先starbucks果個男仔。
唉~，而家D男仔個個都係又咸濕，又講粗口，仲要賭波。
唔通香港無晒好男仔咩!!