有人說，情侶嗌交傷感情；亦有人話，嗌交可以令兩人更加Close。到底嗌大交是建設還是破壞？關鍵在於：你用腦還是用啖氣。
要你做前者，因為用正確的方法吵架，你會爭取到自己真正想要的，同時學識體諒你的另一半。


Stage 1：由小磨擦開始

相處時若發現有些少唔妥，好多女生為了不想破壞感情，都會選擇啞忍。不過，不愉快的事日積月累，最終只會演變成吵大鑊。「我已經忍左你好耐！」的經典開場白後，一連串忍得好辛苦的不快事就傾巢而出，這樣只會令雙方的怒氣升級，令他得出「既然你一直都唔開心，咁一齊仲有嘜意思！」的結論，最終，你兩會一次又一次的鬧分手！

所以，一遇上唔開心既事便要即時提出，平心靜氣地指出你想他怎樣。當然，溝通是雙向的，當他向你表達不滿時，你亦要耐心聆聽同接受。


Stage 2：吵架守則

就如運動會講求體育精神，跟男友吵架亦有規則要遵守，大前提是：
你兩想通過理性的討論達到共識，而不是鬥過你死我活爭啖氣！你的目的唔係贏佢，而係比機會兩個人傾清楚，達到Win Win的大團圓結局。


公平吵架守則

DON'TS
．過於空泛　－　e.g.「你成日都/從來都無……」
．威迫恐嚇　－　e.g.「如果你再……我/你就……」
．性別歧視　－　e.g.「所有男人/女人都……」
．用否定詞　－　e.g.「你唔好再……」、「你都唔係……」
．人身攻擊　－　e.g.「死蠢」、「白痴」、「無腦」
．亂作假設　－　e.g.「如果你鍾意我，你就……」
．妄下判斷　－　e.g.「錯既係你，唔係我！」
．貶低人間　－　e.g.「你真係廢人一個！」
．退縮、迴避問題
．拉家人落水　－　e.g.「成個你老豆咁款！」
．責罵對方　－　e.g.「你累到我……」
．過於含糊
．對方未講完就插嘴，有你講無人講。

DOS
．只談現在　－　e.g.「今次你咁做……」
．達成共識　－　e.g.「咁我地應該點做好呢？」
．指出有關行為　－　e.g.「我未講完野你就插嘴，令我好唔開心。」
．用正面字眼　－　e.g.「下次請你……」
．對事唔對人
．講出自己感受　－　e.g.「當你……我覺得無人理我。」
．體諒對方感受　－　e.g.「我明白你……」
．尊重對方
．面對和處理問題
．只針對對方的行為
．多用「我」作句子開端　－　e.g.「我唔係好開心，因為你……」
．具體說明
．比機會對方講，而且用心去聽。


Stage 3：Time Out！

當你和他的爭拗愈來愈火爆，變成重複、互踩和無建設性時，你便有責任叫停，及時終止這場無謂兼傷感情的鬥爭。以下是四個有效方法：

1.用暗號：你可事先跟他定下一些暗號，例如當你講「朱古力」或「Plan B」，就等於你唔想再拗落去，等大家冷靜下，遲D再傾。當爭拗停止後，你兩不妨各自獨處一會，靜靜地諗下有無其他方法可以解決問題。

2.突然道歉：主動講「對唔住」，就等於給對方一個下台的空間，好多時他都會跟住同你道歉，大家自然和好如初。

3.改變語氣及聲線：轉換話題，例如鬧鬧下交失驚無神軟化一下，同佢講：「我嗌到喉嚨都痛哂，不如飲D野先，話先話，你鬧人個樣好似《無間道》劉華。」

4.轉移情緒：將負面的情緒轉化成正能量，換句話說，即是將仇恨變成一個個愛心因子。例如經過一大輪聲嘶力竭之後，你突然放低聲線，兩眼閃爍咁講：「其實我好鍾意同你一齊，我唔想兩個人互Hurt大家。」


Stage 4：未爆發先預防

大吵大鬧過後，你發現兩人都元氣大傷，唔想有下次，就要採取積極的預防措施：

1.設身處地：想一想，如果你係對方，你會點做？無做錯事但被人鬧會覺得點？他有心對你唔好嗎？

2.層層深入：就好似剝洋蔥咁，細心分析你兩一直糾纏不清的問題，逐層逐層推進，然後搵出雙方言行背後的真正動機(例如想被對方關心、讚賞和尊重等)。當你明白對方真正需要甚麼，就會更懂得體諒他，唔會小小事都嬲一餐。

3.數一二三：當感到自己快要鬧人之前，不妨心裏先數三秒，深呼吸，諗一諗除了嗌交之外，有無其他較文明的方法可以解決問題。

4.糾正錯誤假設：有時，女生的錯誤推理和不夠理性會導致好多無Point的爭執，例如他在街上唔覺意望另一個女仔，你就即刻跳到「你鍾意左第二個」的結論，自己撩交嗌。

5.鬥快冷靜：有時，兩人嗌大交是因為其中一人壓力太大(可能是來自工作或家庭)，一時間忍唔住發火，不自覺搵身邊的人出氣。遇上對方發脾氣，最好自己先保持冷靜，因為以火爆攻火爆，一定無好結果。

6.直接表達：男生樂於聽取直接的說話。所以，如果你真係嬲，最好不要做拍枱或面目猙獰等憤怒的行為，直接講「我好嬲你。反而令對方較易接受。直接兼簡明地講出他令你唔開心的原因，及可以令你開心的方法，他一定好樂意跟住去做。如果唔敢開口，也可以SMS、ICQ和Email。總之，直接表達比嗌交慳返好多啖氣！

7.接受對方：沒有人是完美的，包括你自己在內！所以，盡量不要將他的小小缺點放大成大大過失！