老公仔︰

雖然，我今日收到你封e-card，原本傷o左o既心，係就係好o的，但，其實只係好少少……收card o個一剎那，真係好感動，我喊o左出o來，原來你對我，都仲有o的心；原來，我不是一個人在談戀愛……

但而家，你又再一次掉低我唔理，滿懷希望咁等你reply我，點知……『我要食lunch，一陣見……』之後……了無音訊。其實，你知我真係會等你，甚至有可能明知你去o左返工，都會因為你咁樣走o左去而等你等通宵……而你，係乙水返我之後，係選擇o左再一次傷我o既心。就算，你有千千萬萬o既借口，你都係再一次咁傷o左我o既心…………

我o的直覺真係好準，準到有時都好驚。係icq有人forward o左個一刻館web page俾我之嘛……我又會即刻諗到去試下search你……而個結果竟然又係咁……令人心痛…

然後……我就開始諗一o的我一直以o來都唔敢諗o既o野：我直覺話我知，你唔寫信俾我，唔寫e-mail俾我，但一定有寫俾其他人，仲要一定係女仔，而且一定唔會係短淺o既reply咁簡單……我好傷心，咁耐以o來，我o既直覺好少錯……我唔知o個個係邊個，唔知係一個定幾個，但已經足夠令我好傷心。就算係清白又點？如果係我呢？我去o左英國，你係香港好掛住我，日日夜夜就只係諗住我，為我做好多o野又o係好忙o既情況下寫好多信俾我，但係，我一直都唔覆你，唔係點認真理過你，係英國o既生活你唔問起我都唔講；而結果，俾你知道我原來對其他男仔唔係咁，我會好有心機去理佢/佢o地……我諗你唔需要理o個個男仔係邊個，都已經足夠傷你個心，除非……你跟本唔係咁愛我………

係呢段日子，我有刻意去問你係返工同返學o既o野，我好擔心你適應唔到，我驚你同人溝通唔到、我驚你會唔開心、我驚你會有挫敗感，又驚你舅父對你唔夠好……我驚你係餐館做得唔開心，我想知你上唔上手，我驚你因為言語不通而有好多麻煩……我驚你上堂聽唔明，我驚你會咁而唔開心、自卑……我一直都去諗你感受o架！你知唔知呀？我想你話我知呀！我想同你分擔o架！我想係你唔開心o既時候係你身邊支持你，我想知道你每一樣o野呀！我希望我o地o既感情，係相對o架！我對你好，你對我好；我開心唔開心、有壓力挫敗感會同你share，你同樣地會咁對返我……但，咁耐以o來都唔係o既……由始至終都係得我一個人去努力、我一個人去為呢段感情撐，我一個人係到談呢場唔知有冇結果o既苦戀呀……！！

可惜………我覺得你當我o既存在唔知係乜……有時同你講開o野，你跟本唔記得冇講過俾我聽，你以為，你已經同我講o左……個原因好簡單o者！係因為你同o左第二個講，而o個個人一定係一個女仔……你連自己同邊個講過乜都都唔記得！女人，個個都好小心眼o架……咁細微o既o野，已經俾我一睇睇穿……之後，我好唔開心，我問你，你唔認，但我好肯定個答案……我太了解你喇……你甚至可能連自己係icq or e-mail提過都唔記得………升o左職or做o野範圍大o左，理應該好開心，想話俾身邊人知自己o既進步，但你記起o既，唔係我……我有乜o野，亦都只有我主動同你講，你唔會問……

『miss you，missing you，i miss you……』你有冇發覺呀？我冇同你講過，我最多係講好掛住你，好愛你……因為，我唔想同其他女仔一樣，我知道，實有一o的女仔會咁同你講……我亦好驚，好驚你對佢o地o既回覆一樣係咁………我真係好驚………

其實，我算得上係o的乜o者？係咪因為我太實在，我太主動去keep住我o地o既感情，所以你好有信心，有信心到……跟本唔需要去理會我？……我……真係會走o架…我真係淡緊o架……我而家，已經完全冇頭幾日咁掛住你，我成日諗起你，係因為我驚自己一放鬆，就冇得返轉頭……你唔回信，我會失望，但一日比一日唔在乎……我會同自己講：『算啦maggie，人o地都唔緊，你緊o來做乜？咪有得佢淡囉！唔係你o既錯！呀偉講得o岩…』然後又會怪自己咁易放棄、咁易聽人講，跟住再去催你回信，做俾自己睇：我唔會放棄……

記得美國公報要開戰o個日，我返學前係電視睇到呢段新聞，我好驚，手震、手心霧汗……我發覺，原來我好驚再見你唔到，廿幾個鐘頭由香港去你到o既路程，英國o既加入戰爭，真係令人好擔心可能見唔返……第三次世界大戰o既開始會變到呢個世界點我唔理，我最驚係見唔返你……

但事情o既真實o個面實在叫人好容易想放棄。由隱瞞朋友我o地拍拖、到去旅行唔俾得人知、然後到唔肯改icq info、繼而你決定要去英國…然後一直以來少少都唔肯就我、去到遠方又唔肯回信、一個e-mail都冇、少量icq message、一刻館、你對你o的女性朋友o既回信、對我o既冷淡……我……好灰，我覺得我承受o左太多o野……喊得太多……

功課o既壓力已經令我好辛苦……我好驚半年後o既出路唔知會點，你又唔係我身邊陪我渡過……我真係好驚o架！……我冇信心係呢行發展，我覺得自己比人輸蝕……唔夠料……但第二行我又完全冇興趣去做……我屋企入面，呀爸呀媽家姐呀哥，已經愈o來愈多人去反對我繼續進修，佢o地覺得我讀咁耐書未必有用……呀爸呀媽過o左六十，個個都想我都快o的出o來一齊搵錢，呀媽出年唔做得o野喇……身體亦好差……呀爸最多亦做得三年，中間亦可能隨時裁員……哥家姐又唔點幫到屋企……我真係好煩……我想有個人去照顧下我個心靈咋！早論亦因為你走o左，突如其來o既大量功課，令到我支持唔到，發高燒，好辛苦……係咁發惡夢…… 愛情一直以來係我心目中，都係點點o既力量o架……上年o既失戀，已經傷到我體無完膚；同返你一齊，我以為係我咁大個女做得最正確o既一件事……

國，求求你……去多o的體會我感受……認真去係我立場睇下o丫？我都想知心入面多o的o既感受……個男朋友係我o架！我唔想同人分……你都唔想分我o架？

其實呢封信，係接住你上機前我俾你o既一封，我想你，變得更成熟、更識體會人o既感受，唔會自私……我亦希望我可以收歛得自己好好多……更能控制自己o的脾氣……但，你可唔可以同我一齊互相扶持呀………？我一個人o既努力係冇可能o架………感情如果一開始個底打得唔好……點keep on到四年之久……我o地講過要做俾全世界唔信我o地得o既人睇o架！

信雖然係長o左o的……但咁耐以o來，最深切o既感受都係入面，希望你能夠盡量翻睇，細嚼當中每一句說話……然後一齊去努力……而家o既我，對世上一切都可能睇得好灰、好消極，唯獨是對感情從來都唔放棄……

愛你o既
老婆仔
二零零一年十月二日

愛一個人……
要了解，也要開解；要道歉，也要道謝；
要認錯，也要改錯；要體貼，也要體諒；
是接受，而不是忍受；是寬容，而不是縱容；
是支持，而不是支配；是慰問，而不是質問；
是傾訴，而不是控訴；是難忘，而不是遺忘；
可以隨時牽手，但切記，不要隨便分手。

以上的種種，你我都要學……