「鏈……鏈……鏈……鏈……」

「有人困o係電梯入面呀！」大廈看更福伯聽到警鐘響起之後，抬頭見到電梯停o左o係五樓o個層，於是由樓梯行上五樓，睇o下有冇人被困。

明仔住o係五樓，o岩o岩想出街，見到福伯話有人困電梯，於是幫手一齊拍電梯門。

「有冇人呀？『咯！咯！咯！』」明仔敲o左幾o下電梯門，睇o下有冇人被困。拍o左幾o下都冇人應，當堂放心唔少，福伯仲話：『好彩，冇人被困……』明仔同福伯都諗住走，話口未完，突然聽見電梯裡面傳出『咯！咯！咯！』，電梯內竟然有人回應。

「『咯！咯！咯！咯！咯！』唔使驚，我即刻報警！」明仔敲o左五o下門，然後安慰裡面o既人。「咯！咯！咯！咯！咯！」裡面亦同樣回應o左五o下敲門聲。

呢個時候，o岩o岩有位住客經過，佢係一位休班警員，見到有人被困電梯內，即刻過去幫手。

「有冇人呀？」警員再問。

「……有……有呀……」一把沙啞o既男聲回答。警員隨即叫福伯先去報警，以免被困太耐而令電梯內o既人缺氧。

「你o地有幾多人呀？」警員又問。「五個！我o地一共有五個人……三男……兩女……」回應o既依然係一把男人聲。

「你o地忍耐o下，我o地搵緊人o黎破門！」「好……」男人聲又應。

冇幾耐福伯已帶同兩名消防員上o黎破門，「我o地而家要撬開電梯門，請你o地退後o的！」其中一名消防員對裡面o既人講。「得啦！……」又係個男聲答。

好快電梯門已經撬開，但門一開，在場所有人都即時呆o左o係度，因為電梯入面根本一個人都冇，部電梯係空o既！救「人」o既五個人淨係你眼望我眼，乜o野都唔識講。

第二日，明仔搭o左另一部電梯到地面。只見到福伯o係電梯內燒香拜神。一問之下，至知原來幾年前，部電梯曾經發生過意外，升降電纜斷o左引致升降機墜下，當時電梯裡面有三男二女，無一生還。