我地係點識？其實我地１９８７年已經識得大家架喇！我地係讀同一間
小學既！果陣時我地大家都係得七歲左右，讀緊二年班，我就好動，而
佢就好靜，諗返起我地大家都唔知有冇傾過計。因為大家既性格太極端
，好似大纜都扯唔埋咁，一動一靜。但係唔知點解，雖然我過左黎溫哥
華咁多年，但係我腦海中，仍然仲有呢一個人既存在。二年級同三年級
呢兩年，我地都係同一班。但可能大家唔係同一個圈子，所以從來都冇
一齊玩過。
到我四年級果年，我已經同屋企人移民左去溫哥華，從此，我就係呢間
學校度消失左。而我同佢，亦都冇再見過大家。直到二千年，隔左足足
十一年，佢竟然又係我身邊再次出現。我地唔係在條街度撞到，而係在
icq 度遇番。算算日子，由我地遇番，到而家都有十一個月喇！

我仲好記得我地遇番果日係２０００年４月３０日，果排我剛剛申請左
做「都會學園」既會員，亦都搵番好幾個小學同學，亦都問過我果幾個
小學同學有冇同佢Keep In Touch,但個個都話冇，我諗住可以搵番佢既
機會都好渺茫喇！

點知，係４月３０日，果日我同平時一樣坐係電腦前上網，因為冇野做
，所以我又去左「都會學園」睇下可唔可以搵得返我Ｄ小學同學。點知
真係咁好彩比我見到佢都剛剛申請左做會員，我知道之後就即刻add 佢
落我個icq度。

可能我好細個已經離開左香港，所以我都遇左佢會唔記得我架喇！因為
上幾個我搵番既小學同學都唔記得我。But anyways,佢最後都add 左我
！剛剛果個月我諗住去星加坡探個朋友，跟住再返香港。所以我問佢可
唔可以出黎見下大家，好開心，佢好快就答應左。我去星加坡之前，仲
寫左封信比佢，話比佢聽我幾時返香港，同埋話比佢聽我個電話號碼，
叫佢到時打比我。就係咁，我地就開始做左朋友喇！