我突然想將我的故事講出黎，唔知大家有冇興趣知道呢？我係一個１７歲既女仔，聽日我就放完假要返去澳洲讀書喇！我想講既當然係我既愛情史喇～係９９年，我係ｉｃｑ識左我而家既男朋友，但我當時並唔係同佢一齊，我地因一次誤會而失去聯絡半年，００年佢考完會考，我地先再次聯絡，當時佢話佢鍾意我，對我好好，好關心我，但我當時有男朋友，所以我拒絕左佢，我仲記得佢講過竹句令我好深刻既說話：“唔爭又點顯得你高貴”，之後我覺得呢個男仔好特別，佢似乎好成熟，好獨立，好果斷既人，００年暑假我去完旅行返黎佢話我知２個月後佢要去澳洲讀書，我好愕然，因為佢從冇提過要出國讀書，直至佢走之前既一個月，我剛同我男朋友分手，跟住ｏ個一個月同佢相處多左，我發現我鍾意左佢，但當佢走左之後我地才正式一齊，起初ｏ個半年我地過得好開心，跟住往後既日子，問題接踵而來，０１年既１０月我決定去澳洲讀書，仲同佢一間學校，但過到去情況並冇好轉，佢依然照舊向我不斷發脾氣，我唔想分開，只好一次又一次既容忍，ｏ個種難受我唔知有冇人能夠理解～一個女仔去到外國，咩事都要自己攪掂，佢仲厭我唔夠獨立，太依賴佢，我自問一個禮拜我打唔夠３次電話，每次唔過５分鐘，咁都算依賴．．．我地而家仍然一齊，但佢既脾氣冇改過，上個月仲因為佢心情唔好，鬧情緒，打黎同我講佢仲鍾意佢２年前既女朋友，我聽到之後對佢真係好失望，我呢１年半所做既事都唔及一個玩佢既女仔，我冇出聲，後來佢情緒平伏佢就冇事，然後繼續一齊，呢種既情況已發生左好多次，多到我唔記得幾多次．．．但最令我煩惱既係我過到去讀書識左個男仔，佢同我同班，上個月佢突然向我表白，我知道呢個男仔對我好好，好鍚我，好遷就我，有時我因為我男朋友而向佢訴苦，佢每一次都好留心咁聽我講，而且佢好聽我話，我叫佢做東佢唔會做西，佢仲係一個好純品既男仔，我開始對佢有ｄ好感，但我有男朋友，我知我唔應該，無論我屋企人定係我朋友都話佢比我男朋友好得多，但我又唔想放棄我男朋友，同佢經歷左咁多波折，唔通真係要將佢變成回憶？我好怕自己會後悔，我應該點？