10/07/2002 調左聽日假,放今日,因為一個特別原因......唉!

09/07/2002 今日收工, 又同小威佢地去街啦! 去睇戲 (枕邊凶靈)同埋食飯. 我計過,我地11日裡面見左6次面......有人話我地好顛,仲問:究竟你地悶唔悶架? haha...雖然我都覺得有d顛,但係,我仲未悶喎! 我覺得佢地幾好玩呀! 希望我地可以越黎越多人添呀!!

今晚我返到屋企見到d野,諗起一個道理,發現原來企返o係人地既度睇野,係有咁大感覺架! 我領悟到少少野.

08/07/2002 今日阿渣終於開口同我講, 話我6月份Total遲到左53分鐘, 仲話: “你都知而家咩時勢架啦?! 唔好話你, 我都驚架!” 我明白既, 公司最近炒左咁多人, 佢身為高層都驚, 何況我呢D做細既…佢叫我唔好再玩遲到喎, 唔係佢都保我唔住, 我知喎! 但係我冇玩架! 真係成日唔願起身都冇辦法架…唉! 我分分鐘冇左份工, 諗起都幾驚. 唉! 三個鬧鐘都搞我唔掂, 究竟仲有咩方法呢?

救命呀! 我下爬生左粒暗瘡, 好鬼大粒, 好鬼痛呀~~

07/07/2002 又係沉悶既星期日, 今日買左兩本雜誌返公司咋! 好快就睇哂lu. 老霖同阿晞黎接我收工, 然後去影貼紙相, 食飯同埋睇戲. 點知小威打比我, 話由西貢出緊黎旺角, 佢連同其他會員一行6人搵我一齊食飯, 真係感動呀! 呢個會既會長同埋會員真係唔錯, 大家都快d入會啦! “不分類眾合會所” 呀! 真係好好玩! 好鬼死warm架~~~^^

今晚我同老霖&阿晞去左奧海城睇 “未來報告”, 好好睇呀! 片長兩個半鐘, 但係一d悶場都冇, 非常好!!

06/07/2002 今日放假, 成日留o係屋企冇出過街半步! 因為實在太累啦! 今日用左10個鐘頭時間,幫一個朋友完成好一個homepage,比佢放o係key3 info度! 好野! 竟然可以o係一日之內完成! 太興奮啦! 不過對眼好累呢......

仲有仲有,我今日全日食左兩支煙咋!! 唔知做乜,突然間唔想食煙...^^

05/07/2002 今日係我會所搞活動既大好日子,本來去啟德燒野食,但係臨時改左去九龍城Top Banana,都係燒野食,不過係人地燒埋,而且有冷氣. 食完21:30,落左樓下neway唱K. 今晚真係好多朋友出席呀~~ 多謝您地^^

04/07/2002 放工同左Ferris去食飯先,佢又講左d野比我知......原來天下間既男人係唔一樣架! 希望Ferris佢做到佢所講既野啦! 因為我唔想呢種故事o係呢個世界再度重演! 之後,我同兩個同事同埋老霖去打羽毛球,原本晏晝小威打黎話今晚去食飯架! 可惜我去唔到啦! 不過聽日BBQ都見到面, 大家都唔需要話太掛住我既...呵呵~~

03/07/2002 又放假, 仍然晨早被幾十個電話嘈醒...最後一個電話係13:30, 終於比B頭捉左我去游水. 佢話去九龍公園, 但係我話要去粉嶺泳池先去, 因為其實我真係唔想出街! 游游下, 竟然落雨, 仲落得鬼死咁大, 最後仲行雷添, 所以迫住要走, 驚比雷劈丫嘛......

02/07/2002 終於都放孖days啦! 尋晚重開返我key3 info,覆返哂d留言,搞到05:30先訓...好累呀!! 由於聽日都放假既關係, 所以今日去左街街呀! 同老琪同老霖, 無無聊聊咁又一日. 老霖今日送左個刻左我名既電話繩比我呀! 好感動! 不過, 我部電話掛唔到電話繩呢......

01/07/2002 今日收到一個喜訊, 其實都唔知係咪喜訊, 哈哈! 就係我細佬拍拖呀! 親生細佬, 讀緊港大year one, 今年20歲. 我幻想佢同女朋友十指緊扣果個樣,真係忍唔住好想笑! 不過個衰仔又幾有眼光, 佢女朋友都幾靚丫! 斯斯文文咁^^ 拍拖紀念日係17/06/2002喎, 等我幫佢記住先! Hahaha…^^