31/07/2002 今日最後一日返旺角centre, 真係有d唔捨得. 今晚約左Wing, Fion, 一齊幫阿妹慶祝生日. 仲有Joe, 我細佬同埋我男朋友. 我地去左尖沙咀食日本野, 食完就走, 因為我聽日要返09:00, 所以唔可以玩咁夜.

30/07/2002 男朋友本來今日話要返學, 點知原來睇錯左!! 哈哈! 於是黎左接我收工. 我地去左食飯. 小威打比我, 話好悶, 會同小平落world pub飲酒同掟鏢, 叫我有時間都落去. 我同男朋友食完飯咪一齊去囉,小威介紹左個日本朋友比我地識, 同佢玩十五二十要用英文玩架! 勁搞笑.

29/07/2002 都唔知係好消息定壞消息...我又要過荃灣幫手啦!一借借半年,返9點放5點半,放星期日及公眾假期,星期六半晝,長短週,好就好在可以同男朋友一齊放星期日,又可以早d收工,衰就衰在要早起身同埋要扣我份shift allowance,大拿拿千幾蚊...總之大檸樂啦! 仲要今日先同我講,8月1號就開始過果邊! 唉! 我諗住日日帶飯,冇飯帶就食杯麵,好在諗住8月開始戒煙,如果唔係,日日比同事捉出去煙,買煙都買窮我呀!

期待已久既"烈火雄心II"終於今日播啦! 好正呀! 王喜,仲有方中信添! 再加埋陳慧珊,真係唔睇唔得!

28/07/2002 終於放假,可以比我訓到14:00. 同細佬落街食完飯之後,我同佢返大學宿舍,因為我有D野要借佢部notebook整整. 我男朋友都有一齊出黎,夜晚仲同埋細佬一齊去左石塘咀街市食飯添! 之後,細佬返宿舍,而男朋友就帶左我去佢以前讀書時成日去既"森記"食糖水. 之後,我地落左中環搭天星小輪過尖沙咀,o係海旁坐左一陣,又傾左一陣偈. 最後落返旺角搭小巴返屋企,點知又發生邪野,就係竟然撞到阿棉!!! 笑死我!!! 我真係想問下,點解會咁邪?? 但係邪得黎我又覺得幾開心喎!! 呵呵^^

27/07/2002 尋晚訓左兩個半鐘,今朝又返10:00,但係冇遲到喎,因為有人支持!!放工之後,男朋友又黎搵我!我地去左食飯同埋睇戲,係我地拍拖以黎睇既第一套戲--MIB2. 其實今日勁眼訓,但係當男朋友話:"我想見到你!"既時候,我成個人即刻精神哂!! 夜晚,琪琪打黎詐我型,話我掛住拍拖,唔洗理佢...枉呀!我唔係呀!琪琪~~ 唔好誤會家姐啦!! 我都好愛你架!!

26/07/2002 放工之後,男朋友黎接我收工,然後一齊去銅鑼灣join埋小威佢地食飯. 食完再落尖沙咀in magic飲野,我諗in magic會成為我地經常蒲既bar,因為好抵飲.今晚勁多人呀,我地玩到3點幾,最後男朋友車我返屋企.佢聽日要返09:30架,但係都送我返屋企,真係好,勁抵錫!! ^^

25/07/2002 今日放假, 老豆生日, 夜晚同佢食左餐飯慶祝. 今日下午就最開心, 因為男朋友返黎香港, 佢打電話問我,想唔想見到佢,我梗係想啦! 結果我地就相約左o係粉嶺中心, 飲下野, 傾下偈. 夜晚, 又同男朋友傾左三個鐘頭電話, 今晚傾左好多野, 真係好多, 好深入, 我想話比佢知, 所有過左去既一切, 都已經正式完結, 我, 真係好愛您! 同您一齊真係非常開心, 非常舒服!!

24/07/2002 邪到爆! 今日阿棉收到我封e-mail之後 (封e-mail係send左我同男朋友既合照比佢睇) 同我講, 原來佢地係疏堂親戚黎架...!! 我覺得好好笑, 竟然有d咁既事發生. 今日男朋友返左深圳做野,聽日先返,我叫左佢唔洗特登打比我, 結果佢打左三次長途比我, 真係開心到震呀!! 又係令我超級感動...多謝呀......^o^

23/07/2002 今日勁病! 勁唔舒服! 等左好耐終於等到放工去睇醫生, 點知男朋友放工立即落黎旺角陪我喎! 勁感動呀! 仲送埋我返粉嶺,同埋食埋飯呢! 今日開心到冇野講! 哈哈~~~

22/07/2002 今日終於病左啦! 可能訓教既時候, 冷氣太勁, 被太薄......

21/07/2002 今日公司得我一個咋! 勁慘! 勁悶! 食完lunch又唔記得買雜誌, 結果訓左一陣, 好彩冇比人發現.放工之後,去左唱K,又係同小威果班Friends......我覺得非常好玩! 廿幾人既karaoke好壯觀,最正就係會長表演脫衣舞^^