10/09/2002 今日唔開心到爆,不論公事,私事,電視 (烈火雄心劇情,死人Mark好賤)......加上一號風球,聽日仲話掛三號風球,咁即係...唉! 我好想......勁喊. 我都唔知自己做乜,情緒非常之差...好大壓力呀!!!!!!!!!!!!!!!!救命呀!!!!!!!!!!!完全冇人幫到我,想搵個人陪下,傾下偈都冇...朋友? 又唔可以...就算係好朋友...唉! 更加......唉!......我點先可以冷靜D?

09/09/2002 都唔知係咪我office個位風水有問題,我返左荃灣office咁耐,就一直病咁耐,今日仲做到頭暈暈添...放工又返左屋企睇烈火雄心. 今日男朋友終於返到工,我同佢已經有8日冇見過面,不過今日放工後都冇相約出黎見面,因為,大家都實在太累了. 原本有同事叫我去唱K,我都冇去.

08/09/2002 我諗呢期既日記一定會悶親人,哈哈!因為成日都留o係屋企...今日放假又係留o係屋企休息啦!完全冇出過街,o係屋企睇電視,上網,傾電話,執野,就咁過左一日. 夜晚睇"星光熠熠耀保良",等左成晚就係為左睇許志安,點知佢只係唱左半首"徒然"就走左...真係激死我!

07/09/2002 終於放假, 訓到12:00起身. 晏晝約左鵬鵬同埋老霖出旺角買禮物比琪琪. 由於今晚22:00先開始琪琪既生日party,所以我地有好多時間淨. 我地仲去左影貼紙相,因為我記得舊年9月我同鵬鵬&老霖影過一張咭相,當時大家都不約而同著黑色衫,今日比我發現大家又不約而同著白色衫,又咁o岩相隔左一年,所以咪去影返張咭相留念囉! 之後,我地去左釣蝦,然後去KFC食野.然後去再尖沙咀寶勒巷neway. 但係我未夠01:00已經走左,因為我實在太唔舒服. 對唔住呀琪琪,希望你唔好怪我,我萬分抱歉!

06/09/2002 男朋友今日返左半日工,最後頂唔順,晏晝返左屋企休息!唉!真係擔心死人. 我今日又做到頭昏腦漲,好彩聽日放假. 放工又返左屋企,又係食麥當勞! 烈火雄心原來唔係今日大結局,激死我! 仲睇到我火滾添! 因為本來唐sir同阿yan可以好返,點知最後竟然比阿yan睇到唐sir攬住michelle......不過算啦,做戲就梗係咁架啦!

05/09/2002 今日臨收工先有成177隻a/c既data要入,真係激死我!做到19:00,入左124隻,留返d聽日先做. 放工就返屋企,男朋友今日仍然返唔到工,仍然留o係屋企訓教,訓到對眼腫哂,不過聽佢把聲都已經精神左好多.夜晚買左麥當勞返屋企食,一邊食一邊睇烈火雄心,聽日就大結局啦!劇情好緊張!唔知唐sir同阿yan可唔可以和好如初呢? 希望可以啦!

04/09/2002 今日好精神, 因為尋晚訓左8個鐘! 男朋友仍然未好返, 今日仍然請左病假, 仍然o係屋企休息同埋訓教. 我放工又係好乖, 因為又係返屋企, 仲自己煮飯食添! 冇乜特別, 好平淡既一日, 23:30上床訓教.

03/09/2002 男朋友病了! 病得好嚴重, 病到要請病假, 返唔到工, 成日留o係屋企休息. 而我唯有精神上照顧佢, 因為基於兩大理由, 我唔可以去探佢. 我放工後亦都好乖地返左屋企, 亦都好出奇地22:30就上床訓教. 今日媽媽同我講, 話婆婆入左醫院, 唉! 不過好彩只係留院作身體檢查o者. 今日我重新開放我既會所 "我要儲齊十二星座朋友", 遲d又會同小威一齊搞活動.

02/09/2002 今日爺爺要火化, 大家12:00前已經到達殯儀館,舉行完安息禮拜儀式,然後瞻仰遺容,然後就將爺爺送到鑽石山火化場. 今日喊到對眼好痛,好累,腦海不斷湧現好多個爺爺不同既面孔,笑,喊,病,痛,昏迷,死亡......其實我知呢d都係人生必經既階段...我相信,爺爺已經與主同在.

01/09/2002 今日爺爺出殯,我地一班子孫16:30全部到達紅磡永恆殯儀館三樓. 好多親朋戚友都有黎鞠躬. 爺爺信主耶蘇,所以儀式係採用基督教. 原來而家已經唔比守夜,晚上十一點就要離開,而我地就會扣住一塊小黑布o係左邊胸口,為爺爺守孝. 今日再次見到爺爺既遺容,我又忍唔住再喊左出黎,望住爺爺張相,諗起好多關於爺爺既野,喊左好多次. 我真係好唔捨得爺爺. 自從爺爺過身之後,都冇夢見過爺爺,人地話,咁先好,因為爺爺已經冇任何牽掛,冇野放唔低,好安心咁樣離開,投入主既懷抱,安息.