30/09/2002 今日放AL, 其實冇乜特別事做, 只不過想連續放四日假咋! 訓到兩點起身, 上網, 食野, 睇電視, 過左半日, 男朋友叫我夜晚出去! 於是就換衫, 走左出旺角, 佢首先陪我買禮物比同學仔, 仲買左隻白羊座既miffy比自己添! 其實我唔鍾意miffy, 只不過見佢白羊座有羊咩鬚, 幾得意, 而且又做緊半價 ($35), 所以至買咋! 之後Manson哥哥同埋Michael哥哥 (男朋友d老友) 叫我地落銅鑼灣飲杯野, 傾下偈, 於是我地又落左去, o係茶餐廳一坐就坐到凌晨三點. 其實我冇份傾架! 因為佢地講埋哂d世界大事呀, 股市呀, 果d野我完全都唔識, 就算有心想學下, 都係聽極都聽唔明!

29/09/2002 全日在家休息休息再休息, 冇特別野發生過.

28/09/2002 今日男朋友一早返左深圳做野,不過好快已經搞掂, 11點幾打比我問我上唔上去,行下,食下野,下骨咁,我梗係話好啦! 因為我最近實在周身骨痛! 而且由我屋企去深圳,仲快過出再旺角. 我媽咪同我一齊去,因為佢對於深圳既地方都幾熟. 我地先去飲茶,然後行去一間做緊promotion既地方做全身按摩,連腳底按摩,total三個鐘頭,每人只係$78 (唔計貼士). 夜晚,我地去左向西街食雞煲,真係勁抵,飽到嘔添呀! 我今日真係好開心呢!!

27/09/2002 今日公司多野做到爆! 諗住臨放4日假前可以輕輕鬆鬆咁過埋今日都唔得! 做到頭痛不特止,仲要做到19:45先走得. 本來夜晚約左B頭食飯,改我份保單,但係由於我太夜先走得既關係,而佢又約左班消防員朋友唱K,於是我放工之後就落左尖沙咀搵埋佢唱K. K房內有10幾個人,可以話大部份我都唔識,所以勁悶! 我又唔想去撩人玩,因為我已經冇左呢份興緻! 不過,比我發現左一樣野,原來呢個世界真係好細! 因為其中一個消防員朋友,係我一年前o係key3識過,仲睇過一次戲,不過之後大家都冇再聯絡! 因為我當時比佢既手提電話號碼已經停用左好耐.

26/09/2002 放工去左旺角銀城廣場三樓,大家知唔知係咩地方呢? 就係紅十字會捐血站!! 不過唔係我捐血,係我男朋友捐,我唔係唔敢捐,我之前已經捐過,只不過,紅十字會唔要我d血,因為我d血幫唔到人,我d血有問題...呢樣野對於我黎講都幾遺憾!

之後,我地去左睇戲, TOM HANKS既 "末路驕陽",由22:05做到00:00,地點係旺角百老匯戲院. 我都話係TOM HANKS既忠實fans黎架啦! 套戲今日一上畫,我就走去睇! 不過講真,唔係太好睇; 其實睇個戲名都預左唔洗咁大期望架啦! 我只係一心欣賞TOM HANKS既演出o者!

25/09/2002 今日有100隻account既data比我入,我一日之內入哂,因為我係名符其實既"摩打手"!! 呵呵!! 放工之後,約左個裝修師傅,去左Kelly既新屋,睇下點樣裝修好. 間屋都幾好丫! 只係個廁所細左少少o者.

24/09/2002 今日仍然係超級多野做. 男朋友約我放工去尖沙咀行街同埋食飯,哈哈! 唔知點解有d開心同埋興奮既感覺,可能佢已經好耐冇特登約我去街街啦! 而今日美中不足既,就係比男朋友狠狠咁踩左一腳,痛到我丫! 眼水都標埋出黎呀!!

23/09/2002 尋晚傾電話傾到兩點幾三點,今日好鬼眼訓,成日o係公司食陳皮,企圖酸死自己!! 晏晝男朋友入左黎麗城搵我食飯,本來我帶左飯架! 結果棄左飯啦! 夜晚去左上水搵Daniel食飯,傾到21:30就走啦! 因為我真係好眼訓!

22/09/2002 今日10:30起身,因為要13:00去到機場,應承左送盈盈機!! 佢同Qoo sir難拾難離咁,又喊哂口,真係搞到我唔係幾好意思!又唔知講咩好喎! 盈盈入左閘之後,Qoo sir又好似想喊想喊咁,不過我知佢唔想o係我面前喊...唉!我都唔知講咩好! 12月中盈盈又返黎架啦! 唔洗傷心喎! 來日方長呀!! (不過我知針唔拮到肉係唔知痛既!)

之後去左沙田警察宿舍探JOJO,我地打左12圈,我最後嬴左$336,勁唔勁呢!? 男朋友夜晚又出左去同佢d老友飲野打機,諗諗下,我自從逢星期日放假之後,都冇試過星期日同男朋友去街街,兩個成日都o係屋企訓教! 一係就佢有佢玩,我有我玩! 都唔知點解!? 我當初放棄$1300既輪班津貼,都係為左同佢一齊放星期日o者! 有時都覺得幾唔開心! 但係又要做一個唔煩既女朋友! 相當矛盾!!

21/09/2002 中秋節快樂! 今朝6點幾先返到屋企,於是訓到晏晝5點!好耐冇試過啦!好爽呀!! 夜晚同屋企人食飯,然後同男朋友,同埋老霖同埋one one一齊去左山頂賞月,不過好掃興,因為落好大雨! 原本諗住賞完月就去join小威佢地,結果太大雨,所以冇去到. 今晚o係山頂有奇遇呀,無端端識到二十幾個新朋友,哈哈! 真係好有趣,好搞鬼!
多謝佢地d蛋糕同埋汽水啊!!^^