Dairy of 13/9/2003
2個月前既依個時侯我做緊咩呢?!
果日係我同佢開始,2個月後...
今日放左工我買左d野食就返左屋企
玩左一陣呼拉圈就訓左覺
一起身都7:30,咁我去左跑步
跑下行下就到左海濱公園既盡頭-一個小碼頭
今晚天氣好好,個月亮又好靚,吹下海風個人好舒服
到左9:00幾個fd打黎,咁我同佢傾電話傾左1個鐘就跑返屋企
出一身汗好舒服,返到屋企沖個涼之後點起香薰,熄哂燈聽歌...好好feel,好relax
今晚就靜靜咁過啦.....

Dairy of 14/9/2003
今晚又去玩煮飯仔,又係7個人食飯,又係食得好開心
不過,開心係好短暫...
食完飯我地睇新紮師妹2既VCD
就係咁岩14/7/2003我同佢就係睇依套戲
睇緊VCD既時候我無出聲
直到我地走...
有個fd話車埋我返大埔
不過我真係好想一個人搭下巴士靜下
今晚落雨都無停過,又吹好大風
我開大個窗睇住d雨水整濕自己d頭髮
其實我好想喊
落左車我都無開遮...
一路上由雨水淋,真係唔想返屋企....
唉~~~~~

Dairy of 15/9/2003
今日個天成日都落雨
好似無停過咁
係公司又忙到個人好煩就連lunchtime都無得出去咁濟
所以放左工即刻搭船轉巴士返屋企
我鐘意搭船,因為:
唔想諗起last一日同佢一齊搭隧巴既情形
想吹下海風
想靜靜地慢慢返去
唔想同人迫
最後一點,尖沙咀無同佢既過去
其實我好想知道我係咪仲放唔低佢呢?!

Dairy of 19/9/2003
幾日無寫日記啦,依幾日晚晚返到屋企覆左d留言就訓,根本無咁多精力諗返一日做過d咩,就連icq都無開,今日係公司又做到就死,忙到水都唔得閒飲,壓力又大,我驚我有一日會捱唔住架啦...不過忙都好既,返工時間無機會比我諗返d唔開心既野,今日lunch time落左去sogo搵365日生日bear,我自己果隻好耐之前買左架啦,不過我想搵11月26日果隻,不過搵左100幾盒都搵唔到,叫d fd行開沙田幫我搵下啦,聽日星期六不過我唔想放工去沙田...今日放左工6:00落到california,做到7:30就試下玩yoga,點知個個動作都拉筋,拉到痛到死,到最後訓係地上面做靜止動作,我差唔多訓著左咁濟,好relax,之後做gym做到9:00就沖涼返屋企,又係船上面吹海風成個人鬆哂,上到巴士仲訓著左...聽日終於到星期六啦,依家星期六我放左工都會返屋企,諗返起以前個個星期六都陪佢,依家既星期六點都會覺得寂寞,但又唔想同d fd出街...終於有得好好咁抖下~~呼...

Dairy of 21/9/2003
如果係某一個場合遇返佢會點
我諗我會含住眼淚咁離開
因為我已經面對唔到佢啦
依個月入面我好積極咁改變自己
事實上我無論外表,性格及處事都明顯地改變
但係我都成日嫌棄自己
覺得自己做得唔夠好
試問點樣可以面對佢
我有諗過放棄,但係真係好唔甘心
覺得自己仲會有希望,佢仲會返黎我身邊
"明知等不到亦要等 還好有眼淚來陪襯"
一路等一路改變自己
但係......何苦呢?
無了期咁等.......

Dairy of 27-9-2003
今日本來bbq應該好開心
公司d野又順利
不過有個fd炒左車
好唔開心,好彩佢無事咋
本來話陪佢去醫院
點知個polic叫我幫佢搵下個銀包先
咁咪遲d先去囉....
係路邊又知佢有無事
一心諗住架拖車快d到
無事就好...祝佢早日康服

Dairy of 28-9-2003
諗諗下我真係大個女左啦
做人處事都係
尋晚發生既事黎睇真係覺得自己似返個大人
算啦,唔開心既事唔好提啦
今日好開心,出左旺角睇戲食飯
不過睇<向左走,向右走>果時我唔知點解喊左出黎...
我真係覺得自己好感性呀
兩個人明明係附近都見唔到面
我諗起<十面埋伏>依首歌
依套戲好好睇呀~