2002年10月28日
講d野比你聽丫:
好耐好耐之前(我repeat F.5果年,大約4年前),我仲係新法讀緊書,果陣有一個男朋友,佢返part-time,我果陣零用錢得$250一個禮拜,大家生活都好辛苦,我都話好d,有屋企人,佢就自己一個搬出黎住,因為佢同屋企人意見不合,比家人趕左出黎,我地初初相處都好好,我唔介意佢窮,唔介意佢無時間,不過最介意就係佢有時間都唔陪我…我體諒佢,所以咩都唔介意,同時有一個屋企比較有錢既同學追緊我,成日買好多禮物送比我,叫屋企人渣車接我放學,但係我咩都無接受到…
我同佢提過好耐都無去過海洋公園玩,當我想同佢講分手,因為佢真係唔理我,有一次我胃痛到就死,係屋企喊,佢都唔過黎大埔睇下我,電話都唔聽,仲有成日發我脾氣,仲有成日群埋d黑社會,打交打到成身傷痕要我好擔心,所以我決定左同佢分開, ,點知有一個星期六,佢話同我去一個神秘地方,原來係去海洋公園,對於果時既佢真係好奢侈,我好感動,不過一諗起佢點對我就無哂心情玩,佢睇到就問我咩事,我同佢講無事,佢好聰明,一睇就睇得出,點知佢發我脾氣,咁我即刻話唔舒服,要返屋企,佢無出聲,去到金鐘,我忍唔住同佢講左分手,仲一口氣講左20幾個理由,佢初初仲扮到好型咁走左,留返我一個係金鐘…
我好失望同絕望,不過亦都覺得自己做得好岩,我返到屋企,佢打返電話比我留住我,我好恨心咁拒絕左,因為覺得佢無得救,傷得我太深,唔理我感受,同時,果個有錢仔知道我同佢散左就更加努力咁討好我,希望可以同我一齊,不過,最後都比我拒絕左…
過左一個月後,佢既電話都無間斷,不過我亦好決絕,有一日,佢夜晚11:00打比我,我果陣發高燒,好辛苦,佢好緊張,我話休息,佢好出奇咁肯收線,到左朝早6:30,佢又打比我,我太辛苦,喊住咁講話自己好辛苦,叫佢唔好嘈住我,點知佢話好想見我,仲話有d野想比我,我叫佢唔好痴線,點知佢話係我屋企樓下(佢住青衣),咁我落一落樓下睇下係唔係真,點知見到佢,1個月無見,佢殘左好多,隻手拎住左個紙袋,我拎左個紙袋就返返屋企,望都無望佢…返到屋企,佢又打電話比我,叫我睇下佢比左d咩比我,我一睇就見到有一個暖壺,一包藥,一支水同一隻匙羹,打開暖壺,原來你一壺粥,我一食,好咸,一個未煮過野食既男人識煲粥,我笑左一笑,點知佢講話肯改過,我話比d時間佢,佢笑左一笑叫我抖下就收左線…
之後幾日,我問過好多friend,佢地個個都叫我唔好同返佢一齊,有一個friend仲話佢初初就肯改,到最後又會好似以前咁,又有個friend話佢無錢,比唔到幸福我,不如接受有錢仔,不過我無聽人地點講,堅持自己,同返佢一齊,佢真係肯改過,我開始明白佢唔理我係因為自己無錢,自卑心作祟先會咁做,我體諒佢難處,盡量遷就佢,大家相處得好開心,我都無後悔自己既決定…
有一日,我地行街行過旺角中心,我見到一隻手厄,佢睇得出我好鐘意,佢問幾多錢,個老闆娘話$75,佢就話送比我,佢拎左張$20出黎,原來佢聽錯左$15,佢自己成身得$50,咁我自己比左$75買左隻厄,佢仲同我覺佢搵到錢就買金手厄比我,依件事之後我都無咩特別感覺,因為我真係好體諒佢,尤其佢自卑既心理…(隻手厄我到依家仲戴緊,除都除唔甩)
如是者過左2個月,我地相處得好開心,不過有一日,佢寫左封信比我,話自己真係比唔到幸福我,要同我分手,仲有佢話自己唔知會去咩地方,叫我好好保重同搵過一個錫自己既男朋友,我喊左好耐,仲喊到暈左,夜晚9:30,我自己一個去佢屋企搵佢,點知佢D鄰居同我講話佢交哂租走左,我搵左佢半年都搵唔到佢,亦無接受其他人,依段感情就係咁結束左…
依個唔只係一個故事,仲係我人生中一個經驗,佢教曉我要體諒人,同埋物質上唔係真係咁緊要,2個人開開心心相處都可以好滿足,隻手厄我都除唔到,亦都唔想除,唔係對佢仲有咩期望,只係隻厄可以remind我,”知足常樂”依一個道理…
} else { ?>
☆CC☆ 只跟部份人分享這資訊。